Laugardagur, 22. maí 2010 10:15

Aðalfundur félagsins var haldinn á Hótel Héraði fimmtudaginn 20. maí.  Mæting var sæmileg, en þó hefðum við gjarnan viljað sjá fleiri konur.

Á myndinni er fráfarandi stjórn, en hún hefur staðið fyrir ýmsum viðburðum á liðnu starfsári, s.s. prjónakaffi í Sláturhúsinu, tveim ráðstefnum um málefni kvenna, kynningarfundum, námskeiðum og fleiru. Einnig var á starfsárinu lögð vinna í að aðstoða konur í öðrum landsfjórðungum að koma í gang tengslanetum af svipuðu tagi og okkar. 

Ný stjórn var kjörin og skipa hana:

• Ingibjörg Jónsdóttir, Egilsstöðum
• Ingunn Þráinsdóttir, Egilsstöðum
• Rannveig Þórhallsdóttir, Seyðisfirði
• Unnur Óskarsdóttir, Seyðisfirði
• Þórunn Hálfdanardóttir, Hallormsstað

Varamenn eru:

• Sigrún Þorsteinsdóttir, Fellabæ
• Þorbjörg Gunnarsdóttir, Egilsstöðum

Gerðar voru 2 smávægilegar breytingar á samþykktum félagsins.  Ákvæði um að ársreikningur skuli vera tilbúinn í lok mars var fellt út og frestur til að skila tillögum til breytinga á samþykktum til stjórnar var styttur úr 30 dögum í 14 og þannig færður til samræmis við frest þann sem tilskilinn er fyrir boðun aðalfundar.

Í lok fundar voru konum sem eru í framboði til sveitarstjórna gefinn kostur á að kynna sig og sín stefnumál.  Þrjár konur tóku til máls og urðu hinar skemmtilegustu umræður í framhaldi af því.

Hvatningarverðlaun TAK voru svo afhent og hlaut þau að þessu sinni Ágústa Arnardóttir á Djúpavogi, en hún starfrækir þar hönnunarverkstæðið Arfleifð og leggur mikið upp úr að nota íslenskt hráefni í sínar vörur.

Loks var fráfarandi stjórnarmönnum þökkuð vel unnin störf, en þær sem nú fara úr stjórninni eru:

• Auður Anna Ingólfsdóttir
• Björk Sigurgeirsdóttir
• Eygló Hrönn Ægisdóttir